Per far in budget per il tegnairchasa dovri bain in pau temp, atgnamain èsi dentant pulit simpel. Da princip sa tracti da confruntar las expensas cun las entradas e da las accordar ina cun l'autra.

Faschai l'emprim ina glista cun tut las expensas che resultan en il decurs da l'onn. Tut quellas expensas che na resultan betg mintga mais, midai correspundentamain en imports mensils. En l'internet chattais Vus models da budgets che cuntegnan gia las posiziuns las pli impurtantas e che sa laschan cumplettar. Alura registrais Vus tut las entradas.

Ussa controllais Vus il resultat che sa dat sut il stritg: Sch'il budget è equilibrà e sch'i resulta schizunt ina differenza positiva, è tut en urden. Vus pudais spargnar mintga mais daners e furmar reservas.

Sch'i resulta in minus suenter l'emprima versiun dal budget, stuais Vus controllar anc ina giada la glista e reducir las expensas. Sch'il deficit è mo pitschen na dat quai betg blera lavur. Sche l'import mancant è percunter pli grond, pon esser necessarias mesiras sco midar l'abitaziun u vender l'auto. Quai n'è per il solit betg realisabel a curta vista. I vegn perquai recumandà da controllar pliras giadas per onn il budget per il tegnairchasa e da l'adattar, sch'i fa da basegn. Tgi che vul, po er sa laschar cussegliar d'in post spezialisà. En l'internet datti er models per in budget e calculaturs online.