I vala la paina d'infurmar amis e persunas enconuschentas davart Vossa tschertga d'ina plazza da lavur. Uschia vegnis Vus forsa a savair a temp ch'ina plazza daventa libra ed As pudais annunziar per tala.
Bleras plazzas vegnan però er publitgadas. Ins las chatta en las gasettas quotidianas, savens en ils fegls da plazzas libras agiuntads periodicamain. Er revistas specificas cuntegnan savens inserats da plazzas. Sche Vus n'avais betg abunà sez ina gasetta quotidiana, giai a la biblioteca u en in café, nua che Vus pudais leger las gasettas quotidianas ed emnilas.
En il center regiunal per intermediaziun da lavur (CIL) chattais Vus er bleras gasettas quotidianas e revistas. Nizzaivels èn er il portals per tschertgar cun agid dal computer ch'èn installads tar il CIL. Qua annunzian las firmas lur plazzas libras. Questa SSI (self service information) vegn organisada da l'administraziun publica.
L'internet sco martgà da plazzas da lavur daventa adina pli impurtant. En il fratemp datti bleras differentas bursas da plazzas libras en l'internet. Per part èn questas maschinas per tschertgar ina plazza da lavur gratuitas, per part custan ellas però er insatge. En cas da las maschinas per tschertgar ina plazza da lavur che custan pudais Vus savens depositar ina incumbensa da tschertga per in tschert temp. Vus survegnis alura las novas purschidas da plazzas per e-mail.
Bleras firmas publitgeschan lur plazzas libras sin la pagina d'internet da la firma. En cas d'interpresas e da manaschis guardai per quai directamain en l'internet u telefonai. Quai pudais Vus er far, sch'i n'è publitgada nagina plazza da lavur, ma sche Vus As interessais per la firma. Quai sa numna in'annunzia iniziativa u in'annunzia spontana. Annunzias seriusas e cumplettas han bunas schanzas. Ils documents ston però cumprovar, che la persuna che tschertga ina plazza da lavur è s'occupada intensivamain da l'interpresa u dal manaschi.
I dat er biros per l'intermediaziun da plazzas privats che As gidan a tschertgar ina plazza da lavur. Tar biros per l'intermediaziun da plazzas pudais Vus inoltrar Voss dossier d'annunzia. Sche Voss profil correspunda ad ina plazza libra, vegnis Vus contactà.
